فهد الجبوري ||
تطلع الصبح تباوع على السيارات كل سيارة راكب بيها شخص واحد لو ثنين واغلبهم من الموظفين نسوان وزلم كل واحد راكب سياره اخر موديل وحضرته يستنكف يروح عبريه لو تكسي لو يروح بالخط مال دائرة اله بالسيارة مالته.
هاي النتائج احسبوا شكم دائرة بالعراق وشكد عدد الموظفين بكل دائرة النتائج كارثيه بالإضافة طلاب الجامعات نفس المشكله حضرته ميكدر اذا ميضرب ديكورات ويعلك البصمه والايفون والسماعات بينما اذا تفعل النقل الجماعي راح يحل أزمة جبيره ويقضي على هاي الازدحامات.
اذا قلت السيارات بالشارع ماكو بلد بالعالم الموظفين مالته كلهم يرحون بالسيارات مالتهم ويوميه هاي الازدحامات لو يسون الف جسر مدام هاي الاعداد من السيارات يوميه جاي تطلع فكل نتيجة ماكو وكل يوم جاي تزيد عن القبله.
المفروض الدوله تمنع الموظفين وطلاب الجامعات أنو يروح بسيارته للدوام.
بس ويامن تحجي بلد كلشي بي يمشي بالعكس صار سنين نسمع بمشروع المترو وكلشي ماكو وبالعافية عليكم هاي الازدحامات وشكد مابيكم اشتروا سيارات وروحوا بيها للدوام.
